Библиотека нового поколения IT — ТАЛ

✨ҮРҮҤ ТУНАХ ЫҺЫАХ КҮНҮНЭН✨

✨🟩✨Ыйаахха олохтоммут ыһыах күнэ — бэс ыйын 21 күнэ.

✨Бу былыргылыынан тунах ыйын иккис аҥаара — биһиги тыйыс хотугу кыраайбыт саамай кэрэ кэмэ. Аҕыс ый тухары амырыын тымныыга бохсуллан, хам тоҥон сыппыт дойдубут барахсан айгыр-силик айылҕата, уһуктан, ирэн-тыллан, толору тупсар, ситэри симэнэр.

✨Хараара соҥуоран турбут халыҥ тыа, хампа күөх киистэнэн анньан, күөх нуоҕай мутукчанан күөгэйэ хамсыыр, сирэм күөх сэбирдэҕинэн сибигинэһэ нуоҕайар.

✨Аҥааттар алаастар, унаарар сыһыылар киэҥ уорҕаларыгар эҥинэ бэйэлээх, эгэлгэ дьүһүннээх сибэкки оһуора өтө үтэн тахсар. Ойуурга, толооҥҥо күөрэгэй тойуга, чыычаах ырыата, көтөр-сүүрэр саҥата-иҥэтэ оргуйан олорор буолар.

✨Үлүскэннээх сүүрүктээх үрэхтэр, үрүччэлэр, күлүмүрдүү мэндээрийбит күөллэр, көлүччэлэр дьэҥкэ курустаал түөстэригэр сайыҥҥы саргылаах күн сардаҥатын түһэрэн чаҕылыһаллар.

Ханна да хайыс: эргиччи уһуктуу, тиллии, үүнүү, барҕарыы.

🔸БЫЛЫР-БЫЛЫРГЫТТАН БУ КЭМИ ЫҺЫАХ КЭМЭ ДИЭН ААТТЫЫЛЛАРА. БИҺИГИ ӨБҮГЭЛЭРБИТ — АЙЫЛҔА ОҔОЛОРО — ДЬЫЛЫ-КҮНҮ СӨПКӨ ДА АТТАРАЛЛАР, КЭМНИИЛЛЭР ЭБИТ.

✨КИНИЛЭР САҤА ДЬЫЛЛАРА БУ КЭМҤЭ — ТУНАХ ЫЙЫТТАН САҔАЛАНАРА: КЫҺАЛҔАЛААХ УҺУН КЫҺЫНЫ ЭТЭҤҤЭ ТУОРААН, САҤА КҮӨХХЭ ҮКТЭММИТ КЭМҤЭ, ЭСТЭР-БЫСТАР ЭРЭЙТЭН МҮЧЧҮ ТУТТАРАН, СҮӨҺҮ-АС ТӨЛӨҺҮЙЭР ТӨЛКӨТӨ ҮҮММҮТ КЭМИГЭР. КИҺИ БАРАХСАН, «ҺУУ» ГЫНАН, САҤА ЭРЭЛИНЭН, САҤА ЭРЧИМИНЭН, УЙГУ-БЫЙАҤЫНАН АНААРБЫТ КҮННЭРИГЭР.<…>✨

🔸Төрөөбүт норуоппут ханнык да бэйэлээх иэдээни, алдьархайы этэҥҥэ туораан, өлбөт-сүппэт кэскиллэнэригэр мэлдьитин энчирээбэт эрэл баар буолуохтаах.

✨Эрэлин сүтэрбит норуот мүччүргэнэ суох кэхтэр, эстэр аналлаах. Алаһа дьиэбит аал уотун холумтаныгар биир быыкайкаан кыым кыламныырын тухары биһиги аһыныгаһа суох тыйыс дьылҕаҕа бас бэринэн санаабытын самнары баттатар бырааппыт суох. Ити үөскүөхтээх көлүөнэлэрбит төлкөлөрүн таҥнары дапсыйыы буолуох этэ.

✨СҮРЭХПИТИГЭР ЭРЭЛ ТӨЛӨНӨ КЫТЫАСТАР БУОЛЛАҔЫНА, ХАҺАН ДА ӨЛӨН-ОХТОН БИЭРИЭХПИТ СУОҔА. 

🔸ОНОН ЫҺЫАХ — ИННИКИГЭ ЭНЧИРЭЭБЭТ ЭРЭЛ,

✨ҮҮНҮҮ,

✨САЙДЫЫ,

✨БАРҔАРЫЫ,

✨ӨРӨГӨЙ БЭЛИЭТЭ.

©️(Софрон Данилов✨)

Норуоппут дьылҕата (8-9 стр., 2022 с.)